Mittwoch, 27. April 2011

Whats that, pussicat??

In Bassano auf da Expo siegt ma allerhand.

Wer weiss was das ist gibt a Kommentar ab

cu in the sky
thome

P.S.: Bereits informierte Personen sind vom Quiz ausgenommen!

Dienstag, 19. April 2011

Göödling

Hawidere,

Sunnti wors wieder soweit. Auf da Goding sammas ongongan. Die Teamchefin woar noch longan wieder amol von Onfong on dabei.
The new president "Skyfarmer" Willi hot an Tandemflug vorghobt. Guat. Wos hast guat, auf da Startwiesn Seitenwind und der berühmtberüchtigte Rüggggewind!

Oba nochan, 14Uhr30, is eh gongan. Steirischen Besuch homma a kriagt. Da Präsident (Karl) u. da Vize (Gerald) von die Aflenzer worn do. Hot uns sehr gfreit. Oba schlau wie sie san, homms schon uns als erster starten lossn :-) Bericht is a schon online.


Tiefi u. i beim "pre-flight-gopro-check"


Mit a 6m/s bis auf 2600m mit Tiefi im Duett - bei da Brandlolm wor donn a glei a Differenz von Air- und Groundspeed von 30 km/h do. A murds gekrotze und donn hommas doch noch hamgschofft.


Fliagn mocht jo so miad!

Flüge san do: Tiefi und i

Auf die Frage eines fliegerischen Austauschs Kärnten - Steiermark hot da Gerald gmant, dass ma des ob 15. Mai in Ongriff nehman kennan. Des mochma. Do fohr ma hin. Do Grill ma nochan. Do trink ma Bier. Ajo und fliagn tua ma a.

cu
thome

P.S.: ab Donnerstag werd in Bassano bei da Trofeo gstartet. Schau ma amol wos do aussakummt ;-)

Freitag, 8. April 2011

Wochenend und Sonnenschein....

und dann mitn Moyes ganz allein...

Howdy,

also, nun die Fortsetzungsgschicht vom letztn Mol. Nochdem am Rodschberg schon so schen wor, homma (Wolis, da Sugar Chris u. i) uns am Sonntag die Goding ausgsuacht. Alptherm forecast mit Basis 3100m u. nach die Para-Flüge vom Somstag hot sich des nit schlecht onghuacht. Da Kittner Georg, is a nit so long und intensiv furt gwesen, hot sich a noch dazua gesellt zur illustren Runde.

Am Londinga auf da Grilltisch Wiesn hom sich a olle getroffen und um exakt 12 uhr 40 is losgongen. Verlegung von Mensch und Maschine auf die sonnige Goding. 1200m Höhenmeter und leichter Wind von vurn.
Zwa Parapente schon do und auf amol a Drocheninvasion, an die 15 Fluggeier - Da Ex-Präsi is a aufgekreizt. Mit neuem Skyline Gurtzeug und ATOS VRQT10 (oda wie der haßt). I glab der wills heia wissn.... die Steirers (Herby, Howy u. Hanspeter) san a noch erschienen - Wahnsinn - wie in die 80er. Geile Gschicht. Die Sackl san glei ausse, de wolltn nit so recht mit uns im Hausbartle kreisen. Dabei samma eh zahm. Wir beißen jo nit. Wir pecken nur a bissl... *g*

Die Teamchefin mit ihrem Papa is a noch zuaschaun kumman.

Olle brav aufgebaut hots donn a schon fett auffegeblosn. Da Hubert d'Ohr is ausse und donn wors fian Tiefi und mi kloar. Wir gehens a on. A 150er flaches Dreieck wor a schon im Compeo drinn, also nix wie an die Basis.

Wieder is am Hausbart nit gscheid auffegongan. Ziemliche Ostkomponentn drinn, homma 20min vaschissn.


Oba donn. Auf die Ostflankn mit 1300m donn hintn eine vasetzn lossn und flux wor ma auf 1800m. Donn da Tiefi weiter noch Süden ins Lee und i Richtung Lift. Mit 2,5m pro Sekundn hots mi donn auf 2300m getrogn. Da Tiefi hot noch gegrundlt. Anyway - über der Hochsponnungsleitung homma uns donn getroffn und glei Richtung Soboth aufgebrochn. Da Tiefi vurn auf da Kantn und i querfeldein unter die Wolkn übern Stausee. Mit 80 km/h im Delfininger dahin homma uns schon aus die Augn valurn. Aaaaber da Wills und da Moysi streben zu einander und hom ein Stelldichein über da Aussichtshittn auf da Route 69 erlebt. Trotz ummagurkn auf da Goding nach ca. 45 min. auf da Sobothschi. Richtung Slovenj Gradec wor a fette Wolknstrossn und in de Richtung wor a die erste Wende. Problema - der Weg zur Wolkenstrada wor im Blauen und weite 15 km entfernt. Guckst du:





Links die Wolkenstroßn aus Sicht Soboth (Departure) und rechts aus Sicht Slovenj Gradec (Arrival).

Gott sei Donk homma kan Funk, also mit 2300m einen Flug ins Blaue ongetreten. Zu zweit is leichter und kurz noch Dravograd homma wos gfundn, haße 1m/s. Wurscht, do hasts zruckholtn im "Survive-Modus" sunst stehst untn. Mit 1800m dahinghantlt wor ma donn schen longsom do. Üban Schigebiet is donn losgongan. 4,5m/s integriert und wieder 2300m......Jetzt nur noch Vollgas unta die Wolkn.


Na i will do nit eine! hihi

Unter uns Slovenj Gradec und noch a 20er zur Wende. Wor schon holba dreiviertel 4e... Weiter gehts... bis zur letztn Wolkenbasis mit Speed dahin. Donn, da Tiefi mant im nochhinein er hot eh schon gezagt, i sponn die VG und dem Vario hinterher. 60km bis zum Landeplatz Wolfsberg zagt des GPS und wir schaun auf Velenje! Wor do schon jemond mitn Geier?? I glab nit.

Donn noch zum schenan Wutzl doch der Hund ziagt nit. Des anzige wos do gezogn hot wor der Ostwind. Dafür der mit über 20km/h!. Wie fein hätt der uns wieder noch Dravograd gschobn! Nix da, die Wolkn lösn sich auf und mir san schon auf 1400m.... kurbel kurbel und studier warum kumm i nit zu dir, Wolkili?? Mein Gott, ca. 15 km homma uns gwehrt wie die Löwn, die Thermikkreiserei hot sich nur in der Horizontalen bemerkbar gmacht. Donn da Tiefi noch amol auf 1000m, der gleiche Bart losst aus und da Thome suacht schon Aussenlandemöglichkeitn. A Bundesstraßn war nit bled und a Tankstöll (Bierli!) a. Gesucht - gefundn und donn auf an schenan Platzale eineglondet. Flugzeit 2h 18 min. I stell den Drochn auf die Seitn wal da Tiefi huckt sich a zu mir. A 31er Schnitt trotz gegurke am Start u. Überlebensmodus in Slovenia wor a nit so schlecht.

Umdrahn hob i gezagt, auf die Uhr hob i gedeitet sogt er der Molermaster - oba unbeirrbar und dem Streckenflug verfallen wor da Thome auf Wende Numero 1 programmiert. Nach dem Motto "Barfuss oder Lackschuh" eben. Im Google-Earth schauts so aus:


Jetz war recht wieder hamkumman. Wo samma denn do?? Die Sun scheint, die Segler wern gschleppt, irdendwo neben an Flugplatz wor ma. I geh amol frogn sog i zum Tiefi. Im besten english hot mir donn da Simon erklärt wo ma san. Die Tankstöll is zua, i denk ma Ohh Gott. Mit 5 Eur hob i ihn donn gefügig gmocht und er is aussagruckt mit dem kühlen Gold. A 6er-Tragerle Gösser wor unsa!! Petri-Heil. Gonz nett und donn homma uns auf Deitsch weiterunterholtn, wal des hot er besser kennan da Simon ;-)

Off da Tiefi hot gschaut: "Wo hostn des Bier her??" Beim Schwammalansuachn valosst mi ob und zua da richtige Riacher - oba beim Bier haut des hin ;-))

Obgebaut, den "sauschweren" Willswing a noch zu Stroßn befördert und mitn letztn Pivo auf die Crew (Verena mit Papa) gwortet. Donn die große Auflesung, Aufladung und Betankung. Da Hunger riesengroß samma in Dravograd durch Auskunft an der Petrol Tankstelle zu an Cici-Platzl erste Wahl gelotst wurdn. Cici, Pommes, Ajvar, Senf u. Zwiebl - i sog nur EUR 4,5!! De worn weltklasse.


Tiefi ham, Völkermarkter ham und schon wor 21 Uhr. A richtiger Streckenflugtog mit up's u. down's. So soll er sein.

Conclusio:

Die Toge onfong April san z'kurz und die Basis mit 2300m is tiaf. Z'tiaf fia a flaches 150er oba nit zu tiaf fia a Soboth - Dravograd - Schigebiet Querung. Also im Mai bei 2800m u. a bissl an Ost samma wieder dabei.
Für alle die amol in der Nähe san, is der Landeplatz neban Simon sehr zu empfehln. Fia a klanes Entgeld varot ma die Cevapi-Bude a. :)

So long und vielen Donk an die Rückholer
thome

P.S.: Details zum Flug im XC.DHV.de
P.P.S.: Da Sugar Chris Rosenzopf hot mir brav gfolgt. I hob ihm im Auto beim Auffefohrn gsogt, heite fliagst auf zwa-vier. Gesagt getan, der Schlawiner is mit Kniahänger und an Anfängerdrochn an die Basis gflogn und war 1h45min unterwegs gewesen. Des beim 14. Flug! Gratulation. I sog nur: Gurtzeig muass her!! ;-)

Montag, 4. April 2011

Weekend und Drochnfliagn

Seas blogleser,

also des Wochenende hots in sich ghobt. Am Freitag nachmittag glei amol an holbn Tog Urlaub riskiert. Da Sugar Chris mitn Wills Willwing Falcon is mit mir aufn Radisce auffe. Voller Erwartung wollt ma ersta a bissl Fliagn und donn zum "Season Opener" zum Flughofn.

Um 12e da Himmel zu, dem Stanodla wor des oba a Wurst, konn sich nur noch um Stunden hondln, homma uns glei amol an Olmdudla u. a Coke hinter die Binde gegossn. Um 13 Uhr 15 wors donn soweit. Raschl Raschl und Lotten einegsteckt und auf amol stehn die Geräte voll gsponnt do :-). Aaaaber, der Himmel wor wieder zua.... mein Gott die zwa Paras san a glei amol obgsoffn. Anyway, ausse und die neie Direktaufhängung (7cm tiefer!) und GoPro Upsidedown Funktion ontestn. Wor eh klor, wenn do ana des Licht ausscholtet dass donn nix mehr geht. Da Chris is a glei amol ausse und wir worn eh mind. 10 min in da Luft.

Da Viktor wor so frei und is extra am Rodsche auffe und mit mein Auto uns holnkumman. Präsidenten-like holt *gg*

Donn, wal noch Zeit wor, min Chris zum Otti in den Pavillon auf a Bier und siehe da, es hot wieder aufgrissen grrrrr.

Guat donn einwerfen zum Mäci, zum Obi a Lata, zum Billa 2 Kistn Murauer-Hülsn (fias Onfliagn am nächsten Tog) und donn ins Airrest. Off a Stress he. Donn a bissl die Vorteile vom Aeroclub genossn, Kaltenhofer Ewald war so frei, und danach vom Cheffe der Flugsicherung die Lufträume, Special Rules Areas, Radar Minima, IFR u. Visual Approaches a bissl aufgeklärt gwurdn. Im Grunde genomman tiaf ma eh überoll fliagn. Nur im Luftraum Charlie u. Delta segns uns nit so gern

Donn noch a bissl üba Fliagn gsprachlt, über 100er FAI Dreiecke vom Rodsche usw. und donn zum Schlummertrunk noch St. Georgn zum Orasch.


Somstog, neues Spiel neues Glick, um holba ölfe beim Mäci in Völkermarkt, wo die Belegschoft ausn Woli-Lond (Tiefi, Onkl Wolfi u. da Aeros-Walter) und da Chris mit Chauffeur Papa schon auf mi gwortet hom. Guat hots ausgschaut, also nix wie Vollgas und wieder aufn Radsberg. Mitn Vollgas hots da Onkl Wolfi nit so ernst gnomman. Mit dem Cruising-Speed den er auf da Autostrada an den Tog legt bin i dafür, dass 50-Kubik-Rocker a auf die Autobahn tiafn solltn... Da Chris hot erkonnt, dass er schneller fliagt als er fohrt...

Am Startplatz onkumman worn do a schon a paar Drachinger aufgebaut, also nix wie runter den Geier und aufgebaut den Kerl. A Weisheit hob i a noch erfahren miassn. Die GoPro ohne SD-Speicherkortn bringt nit vül....Wieder guat mitgedocht da Fraissl. Ehrlich gsogt hot gor nit amol so guat ausgschaut. Um dreiviertel 1 is noch immer kana wegkumman, da Schleier Walter is a schon glondet gwesen... um 1 nochan hots a bissl besser ausgschaut und donn hob i ma gedocht: Auf wos denn noch wortn? Also nix wie ausse. Da Tiefi hot a so geton.

I wor glei amol auf 750m und hob eingeparkt, da Tiefi hot a bissl höher eingeparkt und da Lippitz Friedl hot sich a mit die Paragleitinger atosmässig obgekämpft. Auf amol hot des Vario a 2 m/s ongezagt und schon wor ma auf 1400m. Donn Richtung Mostn, standardmäßig, und üban Sender donn auf 1750m aufgedraht. A jo, hob i schon erwähnt dass i im Bodemontl um 7e in da Fruah a 105 FAI-Dreieck ins Compeo eineghockt hob *ggg*
Da Tiefi is donn glei umme zur Matzn, i noch. Da Lippitz mitsomt sein Atos hot gekniffn. Bad decision.

Mit 1200m auf da Matzn ostseitig umagekrotzt samma donn auf die Westseite. Lehrbuchmässig die Abrisskante angflogn und 2.5m/s waren uns hold. Im Lee is schee und schon wor ma mit 4 m/s auf 2300m. Flott weiter zur slowenischn Grenz, gor kane zwasprochign Ortstafeln da hob i mir gedocht, und donn nach dem Motto "going back west" Richtung Mittogskogel aufgebrochen.


Da Tiefi in die Karawankn. Mit GoPro u. SD-Kortn!

Iban Loibl wor a guat oba a bissl später wor ma schon wieder auf 1900m. Vur ane Bergwanderer hom die zwei Abfangjäger im Stealth-Modus aufgedraht und worn glei auf zwadrei. Weitergehts. Auf amol da Tiefi auf Grathöhe mit die Handsch in der VG-Schnur vabandelt hob i aufdakurbelt. A Haufn Verkehr do auf da Südseitn von de Karawankn.

Donn homma uns aus die Augn valurn. I wor jo auf FAI Dreieck programmiert und bin zur ersten Wende. Da Tiefi weiter noch Westen. Zweiter Waypoint wor das Schigebiet Kravavec. Also nix wie Höhe tanken und auf gen Osten. Aussicht auf Slowenien (Bled mit See und Insel) top, Kärntn mit die vielen Seen und de schneebedecktn 2000er
ein Wahnsinn. Wo wor die Speicherkortn nochmal?? Jo nix wie weiter hot mir a Vogl an 4m Bart ongezagt. mit 2400 unter da Wolkndeckn noch Trzic do is donn a 6m Monster gstondn oba die Basis wor tiafa.... Weiter Gas nach Preddvor und donn mit 1700m beim Schigebiet Kravavec (später hob i erfohrn, dass die Petzenflieger do auf Ausflug worn) mit an Paraglider im anzign Sonnenfenster ummagekurbelt. Nächste Station wor jetz da Radsberg. Des is jo bei so ane FAI Dreiecke des leichte, san nur 3 Wendn. Des is oba a schon olles wos daran leicht is :-))
Donn bin i alan weiter und hob mi so a bissl auf 1900 schwindln kennan. Mit a 20m Obstand zu die Felswänd so ane Hebalan mitgmocht wor i auf zwa tausend. Gott sei Donk hot donn a bissl mehr aufgmocht und da Grintavec wor in da Sun, oba hot a an Huat aufghobt. Durtn hin, Obrisskantn jaja, hauts ma fosst die Basis aus da Hond, kummt a fetter Odler dazua. Eh kloar. Wor jo a 5m Gerät wos i do aufdarissn hob juhuuuu. Auf 2500m is donn wieder so komisch neblig gwurdn bin i weiter Richtung Rodsche. Donn a Blick rechts und i hob mi fost ongmocht. Die Steiner Alpen in voller Pracht ganz nahe. Sieg sie jo sunst nur von da weiten oba dafür do aus da Kuchl, WZ, EZ, SZ, Bad etc. ;-)
Gleit gleit gleit gleit, denk i ma wo bin i denn do??? Siehe da, a See, a Kirchn, Teifl eine des kenn i. Eh kloar, Seebergsottl. Donn a zartes 1 Meter Bartili bis auf 2600 ausgekurblt und straight through zum Hochobir. Do steht a schene Nocken, wie da Niki Pichler zu sagen pflegt.
Mit 1900m onkumman auf da Südseitn, hots do wieder ongrissn mit an 5er und da Tiefi is a wieder aufgetaucht. Cooole Gschicht. In nullkommanix wor i wieder auf 2600. Schüttelfrost inklusive. Den Wolfsberger Buabn hot des Heimweh gepockt, is auf 2700m und Richtung Petzn.

Fia mi wors donn gonz easy den Sock zua zu mochn. Iba dem Startplatz zwa Trudla links, zwa rechts a paar fette Wingover und donn Überfeger über Ottis Pavillon. Echt a potzn Gaude gwesen der Tog. Flugdetails san do.


A 109er FAI Dreieck is des gwurdn.Ongeblich des erste dreistellige ever am Radisce! Feini Feini. Des mocht Lust auf mehr!

Die ondaren san a bissl später gstartet und musstn ca. 1,5h warten bis die Querung auf die Matzn gelungan is. I sog jo Timing is des holbe Leben *fg*

Danoch 2 eiskalte Londepatronan in Rottenstan (die Teamchefin is zu aller Freude a noch nochkumman), obgebaut und donn mit die Freind zum Raunjak auf a gebrettelte Jausn. A perfekter Tog!!!

Im Headquarter, Eingeweihte wissen worum es sich hierbei handelt, noch an murauschen Hopfen/Malz-Eistee und donn mitn Chris wieder ham ins Unterlond. Morgen is jo a guat ongsogt. Do gemma donn auf die Goding.

Wies do gongan is, des kennts donn bold amol lesen, wal olles varrot i so schnell nit ;-))

Greez
thome

P.S.: Des Heimweh hot den Tiefi hamgebrocht. 161 Kilo hot der mit sein Wills obgedruckt, unglaublich, ne?